Siz aytayotgan «chiyillash» – shunchaki tovush emas, balki kompyuterda “hammasi joyida” ekanligi haqidagi signaldir. Ba’zida esa, spiker butunlay boshqacha ovoz beradi, yoki umuman jim turadi. Bu bilan u qayerdadir nosozlik mavjudligidan ogohlantiradi.
Kompyuterning «tili»ni tushunib olish uchun spikerning quyidagi asosiy signallarini bilib olishimiz lozim bo‘ladi:
— bitta qisqa signal – hamma jihozlar to‘g‘ri ishlamoqda;
— signal umuman yo‘q – ozuqa blokida muammolar mavjud, u ona plataga ulanmagan bo‘lishi mumkin, shuningdek, ona plataning o‘zi ham ishdan chiqqan bo‘lishi ehtimoli mavjud;
— uzluksiz signal – ozuqa blokida nosozliklar bor;
— ikkita qisqa signal – ahamiyatsiz nuqsonlar mavjud;
— bitta uzun, takrorlanuvchi signal – tezkor xotirada muammolar mavjud, uni slotdan chiqarib olib, qaytadan joylab ko‘ring.
Yuqoridagilardan tashqari yana ko‘plab signallar bor, lekin bu yerda faqat eng asosiylarini keltirishni lozim topdik. Boshqa signallar kamdan-kam hollarda uchraydi.